काळा रंग आपल्याकडे अशुभकारक मानला जातो. त्यामुळे शक्यतो घरसजावटीमध्ये तो वापरला जात नाही. पण या रंगाबाबत थोडा सकारात्मक विचार करून भिंतीवरच्या सजावटीसाठी त्याचा वापर करता येईल. तसं केल्यास हीच भिंत घराची शान वाढवेल हे नक्की. निळा, जांभळा, हिरवा, लाल अशा ठरलेल्या रंगात घरातल्या भिंती रंगवण्याबरोबरच काळ्या-पांढऱ्या रंगांनाही पसंती मिळू लागली आहे. पांढरा रंग एकवेळ चालून जातो; पण काळ्या रंगाचा घर सजवण्यासाठी वापर करणं म्हणजे अनेकांच्या कपाळावर आठ्या येतात. कारण हा रंग अशुभकारक मानला जातो. त्यामुळे वास्तूमध्ये तो वापरणं शक्यतो टाळलंच जातं. या गोष्टी न मानणारी मंडळी घर सजावटीमध्ये काळ्या रंगाचा वापर मोठ्या कल्पकतेने करतात. तुम्ही आपल्या घरासाठी वेगळेपणा शोधत असाल, तर भिंतीला काळा रंग देऊन पाहा. एकदम सगळ्या भिंती रंगवणं भडकपणाचं ठरू शकतं. त्यामुळे एखाद्या भिंतीला काळ्या रंगाने सजवून पाहायला काहीच हरकत नाही. त्यासाठी या काही कल्पना... - काळा रंग मुळात निराशाजनक मानला जातो. त्यामुळे संपूर्ण भिंत त्यानेच रंगवण्यापेक्षा त्याबरोबरीने इतर रंगांचाही सर्जनशीलतेने वापर करता येईल. दोन रंग, उभ्या-आडव्या रेषांचा डिझाइन म्हणून वापर करायला हरकत नाही. संपूर्ण भिंतच काळ्या रंगाने रंगवायची असेल, तर त्यावर वापरण्यात येणाऱ्या डेकोरेशनच्या वस्तू कल्पकतेने वापराव्या लागतील, - चित्रांमुळे भिंतीना शोभा येते. त्यामुळे निसर्गचित्र, एखादं पोर्ट्रेट काळ्या रंगाच्या भिंतीवर लावायला हरकत नाही. याच्या फ्रेम मात्र काळ्या रंगाला शोभून दिसतील अशाच निवडाव्यात. - विविध आकाराच्या आरशांचा वापरही काळ्या रंगाच्या भिंतीची शोभा वाढवेल. मात्र, संपूर्ण भिंतीभर आरसे लावायचे नाहीत, तर एखादा कोपरा किंवा मध्यभागी आरशांची आरास करता येईल. - जुनी, दुर्मिळ आणि अनोखी नक्षीकाम असलेली ताटंही वापरता येतील. पितळेच्या किंवा पंचधातूच्या ताटांचा विचार करायला हरकत नाही. - एखादं विचित्र आकाराचं, पॅटर्नचं घड्याळही या भिंतीवर लटकून द्या.
- फोटो कोलाज हा तर उत्तम पर्याय आहे. कुटुंबातल्या सदस्यांच्या लहानपणीचे किंवा इतर संस्मरणीय फोटो या भिंतीवर उठून दिसतील. ते ब्लॅक अॅण्ड व्हाइट असतील तर अधिक चांगलं. मात्र, त्याची फ्रेम क्लासी असून चालणार नाही, तर ती अॅण्टिक असावी. - अगदीच काळा रंग नको असेल, तर त्याच्या छटा वापरायला हरकत नाही. - कायमस्वरूपी काळा रंग वापरण्यापेक्षा ट्रायल म्हणून आधी एखादा वॉलपेपर लावून पाहा.
टीम टाइम्स प्रॉपर्टी mtartnedit@timesgroup.com
Source
No comments:
Post a Comment